March 2, 2010

ನಮ್ಮೂರಲ್ಲಿ ಜಾತ್ರೆಯಂತೆ

ಸಿರ್ಸಿಯಲ್ಲಿ ಜಾತ್ರೆಯಂತೆ
ಸಿಕ್ಕಾಪಟ್ಟೆ ಜನರ ಸಂತೆ
ಜನರದ್ದೇ ನೆರೆಯಂತೆ

ಹೋಗಿಬಂದವರು ಹೇಳಿದ್ದಿಷ್ಟು

ಬಳೆಪೇಟೆ ಒಳಗೆ
ಬಳೆಯೂ ಇದೆಯಂತೆ
ಬಳೆತೊಟ್ಟ ಹುಡುಗಿಯರೂ
ರಾಶೀ ಇದ್ದರಂತೆ
ಹಿಂಡು ಹಿಂಡು ಹುಡುಗರೂ ಅಂತೆ

ಹೋಗಿಬಂದವರು ಹೇಳಿದ್ದಿಷ್ಟು

ಸಣ್ಣತೊಟ್ಲು ದೊಡ್ ತೊಟ್ಲು
ಎಲ್ಲ ಬಂದಿದೆಯಂತೆ
ಬಾವಿ ಒಳಗೆ ಕಾರು
ಸೈಕಲ್ಲು ಎಲ್ಲ ಬಿಡುತ್ತಾರಂತೆ

ಹೋಗಿ ಬಂದವರು ಹೇಳಿದ್ದಿಷ್ಟು

ತೊಟ್ಟಿಲ ತೂಗುವ ಅಮ್ಮಂದಿರೂ
ಬಂದಿದ್ದಾರಂತೆ
ಅಮ್ಮ ಮತ್ತು ಅಮ್ಮ
ಇಬ್ಬರೂ ಇದ್ದಾರಂತೆ

ಹೋಗಿ ಬಂದವರು ಹೇಳಿದ್ದಿಷ್ಟು

ಸಿಕ್ಕಾಪಟ್ಟೆ ಕಳ್ಳರಸಂತೆ
ಡಬ್ಬಲ್ಲು ಪೋಲೀಸರಂತೆ
ಎಲ್ಲರನ್ನೂ ಎಲ್ಲರೂ
ಹುಡುಕುವವರೇ ಅಂತೆ

ಹೋಗಿ ಬಂದವರು ಹೇಳಿದ್ದಿಷ್ಟು

ಹೋಗುವ ಮುನ್ನ ಕೇಳಿದ್ದಿಷ್ಟು

ಮುಂದಿನ್ ವಾರ ಜಾತ್ರೆ
ನಿಂಗೆಂತ ತರವ್ವು?
ಬೆಂಡು ಬತ್ತಾಸು?

‘ಬ್ಯಾಡ’

ಹಂಗಾದ್ರೆ... ಬಳೆ?

‘ಬಳೆ ಬ್ಯಾಡ ಹೇಳಲ್ಲಾಗ, ಅದ್ಕೆ ಬ್ಯಾಡ ಹೇಳದಿಲ್ಲೆ’


ಹಂಗಾದ್ರೆ... ಎಂತ ತರದಪಾ? ಹ್ಮ್..... ಗೊಂಬೆ???!!!

‘ಹ್ಞೂ... ಗೊಂಬೆ ಅಡ್ಡಿಲ್ಲೆ’

ಹಂಗಾದ್ರೆ ಗೊಂಬೆನೇ ತಗಬರ್ತಿ ನಿಂಗೆ.

ಹೋಗುವ ಮುನ್ನ ಆಡಿದ್ದಿಷ್ಟು



ಬಳೆಪೇಟೆಯಲಿ
ಹೇರ್ ಕ್ಲಿಪ್ಪು, ಬಳೆ,
ಬಂಬಾಯ್ ಮಿಠಾಯಿ,
ಗೊಂಬೆಯೂ ಇದೆಯಂತೆ
ಆದರೆ ನೆನಪೇ ಇರಲಿಲ್ಲವಂತೆ
ಈ ಪೆದ್ದುಸ್ನೇಹಿತೆಯ
ನೆನಪೇ ಇರಲಿಲ್ಲವಂತೆ
ಇಡಿಯ ಜಾತ್ರೆ ಹುಡುಕಿದರೂ


ಹೋಗಿ ಬಂದವರೊಬ್ಬರು ಹೇಳಿದ್ದಿಷ್ಟು
ಹೋಪಕಾದ್ರೆ ನೆನಪಿತ್ತು....
ಅಲ್ಲಿಗ್ ಹೋದ್ಮೇಲೆ...

ನಿನ್ನ ಪ್ರೀತಿಗೆ ಅದರ ರೀತಿಗೆ...

ಓದುವ ಹಂಬಲವೇ ಬರಹಕ್ಕೆ ಬೆಂಬಲವೇ ಸ್ವಾಗತ. ಅಪೇಕ್ಷೆಯಿರದ ಪ್ರೋತ್ಸಾಹವೇ ವಂದನೆ. ಸಿಗದ ಉತ್ತರಕ್ಕೆ ಇರದ ನಿರೀಕ್ಷೆಗಳೇ ನಿಮಗೂ.
ಪ್ರೋತ್ಸಾಹದ ಹೆಜ್ಜೆಗಳೇ ನಿಂತು ದಣಿವಾರಿಸಿಕೊಳ್ಳಿ. ನೆನಪಿನ ಗಡಿಗೆಯೊಳಗೆ ಕನಸೆಂಬ ತಣ್ಣನೆಯ ನೀರನ್ನಿಟ್ಟು ನಡೆದುಬಿಟ್ಟಿರುತ್ತಾಳೆ. ಸಿಕ್ಕಿತ ನೀರು? ಇಲ್ಲಿ ಇಂಗಿಹೋದರೆ ನೀರು ತುಂಬಿಡಲು ಅವಳನ್ನೊಮ್ಮೆ ಕೂಗಿ, ಇಲ್ಲಿಟ್ಟ ಗಡಿಗೆ ಒಡೆದರೂ ಅವಳನ್ನೇ ಕೂಗಿ.

ತಣ್ಣಗೆ ಬೀಸುತ್ತಲಿರುವುದು ಕಲ್ಪನೆಯ ಗಾಳಿಯೇ? ಸಕಲವೂ ಇಲ್ಲಿ ನೆನಪು ಕನಸುಗಳ ನಡುವೆ. ಅಗೋ... ಅಲ್ಲಿ ಆ ಆಂತರ್ಯದ ನಡುವಣ ವಾಸ್ತವ ಸೇತುವೆಯೂ...

.